DAMAYAN-BULUSEÑO GAZETTE ONLINE EDITION |
This page is originally located at the following URL:
https://dbgazette.tripod.com/printables/vol16no4_page3_damayan.html
"An Legasiya ni Igsoon Martin"
BAGAMAN mamumduon an pamilya ni Igsoon Martin Halum dahil san pagkamatay
niya, dako man na konsolasyon sa kanira na may magayon na legasiya siya na
binilin sa mga dati niya kaupod sa bokasyon nan sa kapwa Bulusanon.
Dati padi si Igsoon Martin mientras nag-asawa. Inumaw ko siya san
prangkahan niya sinabi sa ako na habo niya dayaon an sadiri nan kapwa sa pagtago
sin illegal na relasyon sa sayo na babaye lalo pa na nakasotana pa siya.
Makokonsensya kono siya na magsermon sa mga tawo san mga adal san simbahan na
siya mismo diri nakasunod.
Kaya, pormal na nagpaaram siya sa Roma na matalikod na sa kaniya bokasyon
para magpakasal sin legal sa babaye na namut-an niya, si Marietta Moraleda na
taga Sorsogon City. Duwa an kanira bata.
Naogma ako san pagbagat mi pagkatapos sin halaba na panahon sa Philippine
Village Hotel sa Parañaque mientras siya mapa America.
Hali siya sa Bulusan, nag-atender san lubong ni Manoy niya Pacien. Inumaw
niya an mga proyekto san Damayan-Buluseño na nababasa niya sa Gazette na
pinadara ko. Para makadanon man, nagboluntad siya na maging sponsor sin
sayo na scholar na hali sa pobre na pamilya.
Tiempo man na mientras siya namatay, nakagraduar pa hamok an kaniya scholar.
San namatay siya, nakasulod pa hamok bilang maestra sa sayo na escuelahan san
madre an scholar. Nakamatayan niya an sayo pa na gusto niya makatapos sin
engineering sa Bicol University sa masunod na taon.
Gustuhon ni Igsoon Martin na magpaadal pa konta sin mga matali na pobre
na mga kabataan dahil gusto niya isabuhay an pilosopiya ni Confucius na “If
you give a man a fish, he will eat for a day.
But, if you teach him how to fish, he will eat for the rest of his
life.”
Sayang,
binawian tulos siya sin buhay. Daghan pa konta an magiging propesyonal hali sa
mga pobre na pamilya. Pero, nawara man siya, may binilin siya na panalmingan sa
mga dati niya kaupod na nakasotana, nan sa mga kapwa Bulusanon lalo na sa mga
may kaya sa buhay kon pan-o magmakulog sa kapwa lalo na sa mga nagtiti-os na
pamilya. Magayunon na legasiya an
binilin ni Igsoon Martin.
*
* *
SALA an mga nagsasabi na negatibo sa administrasyon an Damayan-Buluseño
lalo na ako dahil san mga insusurat ko dini sa Gazette. Positibo permi an
Damayan-Buluseño lalo na ako sa administrasyon san sin-o man na nakapuesto
basta para sa kaayadan san komunidad.
An mga inbubulgar ko sadto pa nangyayari sa iba na administrasyon sugad
san darayaan nan barakalan san boto, illegal logging, nan mga poste.
Kaya hamok nasobrahan niyan kay apektado na sin husto an komunidad lalo
na an mga kabataan na inlalaoman ta na maging lider sa maabot na panahon.
Lalo pa niyan hunababaon an moral values san mga tawo kaya harayo
kita sa pag-asenso.
Lalo sala an mga nagsasabi na diri ako dapat maki-aram san pulitika sa
Bulusan. Sira an sala na pinabayaan
hamok ini na mga maraot na nangyayari. Tandaan
nira kon magpadagos ini na situasyon kay pagbabasolan nira sin husto kon mas
grabe pa karaot an himuon sini na mga kabataan sa panahon nira dahil san naimod
nira na klase san pulitika niyan.
An mga karibukan niyan an resulta sadto na maati-on na eleksyon. An
binuhos na kuarta san gobierno para hamok diri mahali sa puesto an mga nasa
administrasyon an dahilan san krisis niyan kaya, daghan an nagiging kriminal nan
nag-aalsa na iba-iba na sektor kontra sa gobierno. Sa situasyon niyan san
ekonomiya dahil san kanira abuso dapat na makonsensya na sira nan mag-isip sin
pagbag-o.
*
* *
Kon totoo na negatibo ako sa administrasyon, dapat an mga mas magub-at na
isyu an inbulgar ko na sigurado lalo makaraot san kanira imahen.
Pero, habo ako kay diri man yuon an tuyo ko kondi an mga bagay na dati na
nangyayari na dapat maalto dahil nagiging seryuso na na problema.
Para patunayan ko na positibo ako sa administrasyon, niyan ko sasabihon
an totoo. AKO MISMO an nagsurat san artikulo dini sa Gazette san Agosto 2002 na
an titulo, Mayor Guysayko, A Dynamic Leader.
Ako man mismo an nag-insister na ibutang permi sa front page
san Gazette an mga proyekto san munisipyo para maaraman san publiko.
Dahil san mga artikulo na yuon inumaw si Mayor Guysayko san mga tawo lalo
na an nasa Metro Manila nan iba na lugar.
Kaya hamok san awat na, dahil san mga naaraman nira na diri mga mayad na
nangyayari na hali mismo sa mga taga munisipyo, daghan na an nagrereklamo na
kaya permi an mga mayad an inbubutang sa Gazette dahil pareho kono kami miembro
san Aguilar clan.
*
* *
An mga nasa public service diri dapat maging balat sibuyas.
Dapat bukas an isip sa mga negatibo na komentaryo san sin-o man lalo na kon
totoo. Diri puro hamok pag-umaw an paglauman. An Damayan-Buluseño lalo na ako
permi sa pag-umaw san mga dapat umawon. Pero, permi man negatibo sa mga bagay na
nakaraot sa komunidad. Mao yuon an
tunay na kahulugan san demokrasya.
Pero, may mga masyado nahubog sa puersa nan impluensya na wara na galang
sa press freedom san demokrasya. Habo sira na may kontra sa kanira mga
sala na inhihimo. Kaya, daghan na an itinumba na mga may prinsipyo na
komentarista sa TV, radyo nan diyaryo.
Aram ko, dahil san mga inbubulgar ko, sobra an init sa ako san iba-iba na
sektor na mga tinatamaan. Namati-an ko na may mga plano na sira sa ako.
Kaya, ipinapasa Diyos ko na an buhay ko. An totoo, sa kada pag-uli ko sa
Bulusan, diri na ako naglalaom na makabalik sin buhay sa Quezon City.
Kunsabagay, mas ika-ugma ko kon sa sadiri ko na bungto ako itumba kay
dini ko ipinaglalaban an ako prinsipyo. Mamatay man ako, may kahulugan an ako
kamatayan.
Pero, an naimod ko, kondi brutal na kamatayan, bigla ako mawawara nan
panahon na hamok an makapagsabi kon diin ako nakalubong. Mangyayari ini sa iba
na lugar para ilihis sa mga dapat makaaram kon sin-o an mga nasa likod san plano
para mawara ako.
Pero, mientras nira ako itumba, eksaminon ngon-a nira sin husto an kanira
konsensya, kon sin-o an may kasalanan sa bayan, AKO o SIRA? Kon an sobra
ko na pagmakulog sa Bulusan nan kapwa ko Bulusanon, BUHAY KO AN KATIMBANG,
MAOGMA AKO NA NAMAARAM.
Vol. XVI No.4 (August - September 2004)
Copyright © 2003 - 2004 Damayan-Buluseño Gazette Online Edition | All Rights Reserved