DAMAYAN-BULUSEÑO GAZETTE ONLINE EDITION |
This page is originally located at the following URL:
https://dbgazette.tripod.com/printables/vol15no9_page2_batobato.html
Sadto,
maski bata pa respetado siya san mga tawo
Dahil
responsable, an pamilya siya an inuurgulyo
Niyan,
dahil sa kaniya an pamilya niya problemado
Nagbag-o
na an ugali nan pagkatawo san ato soltero
Sadto,
wara nagayod siya sin maski nano na bisyo
Diri
nasasangkot sa kaso kaya an buhay trangkilo
Niyan,
dahil sa shabu sa “death row” siya kandidato
Dahi
nang “rape” sin gurang na babaye an ato soltero
Sadto,
gusto niya maka-irog man san kaniya iniidolo
Kaya,
an buhok niya kapado kapareho ni Aguinaldo
Niyan,
an buhok halabaon di maaraman an kapareho
Di
man puede si Kristo kay bunghagon an ato soltero
Sadto,
sa barayle an sayaw niya puro pang romantiko
Magayon
mag-cha-cha, boogie, paso-doble nan tango
Niyan,
an sayaw niya palukso-lukso, pasirku-sirko
Kaya,
bari an li-og nan tuhod, baldado an ato soltero
Sadto,
pagkaaga nagdadanon sa ama sa mga trabaho
Nagbabante,
nangahoy o nasa pasakay nag-aarado
Niyan,
pagkaaga nanudlay sa atubangan san espeho
Sigue
na an pagayon, kulibangbang na an ato soltero
Sadto,
para mag-ogma pagkagab-i sa salonan deretso
Pasayaw-sayaw,
painom-inom, may ka-“table” na GRO
Niyan,
pagkatutnga, nakabestida, yadto na sa kanto
Kay
masignit sin tin-edyer na guapo an ato soltero
Sadto,
lalake na lalake siya, macho nan maskulado
Wara
sin sinabi sa kaniya si Erap o Fernando Poe
Niyan,
kon may mga naghahapot kon bakla siya kono
Di
ako bakla “girl” ako, an simbag san ato soltero
Sadto,
dahil magayon an tindog nan talagang guapo
Kinukuwa
siya na magkonsorte sa Sta. Cruz de Mayo
Niyan,
di na siya puede kay an situasyon nagkambyo
Dahil
an inpaparada na Reyna Elena an ato soltero
Sadto,
an maging pulis o militar an kaniya gusto
Dahil
ini kono an pang-tunay na lalake na trabaho
Niyan,
gusto maging padi kaya sunulod sa seminaryo
Dahil
sa parokya makapili sin “papa” an ato soltero
Sadto,
popularon siya sa pagiging tunay na gigolo
Nagbibilang
siya sin mga babaye, talagang palikero
Niyan,
nagpa-“sex change” mapakasal sa papa na macho
Dahil
gusto kono maging “tanging ina” san ato soltero”
Sadto,
an tugon sa kaniya mga sobrena nan sobreno
An
dapat igahoy sa kaniya si Manoy Engracio
Niyan,
pag ginahoy sin Manoy diri na niya gusto
Nahiyom
kon an gahoy “Manay Grace” sa ato soltero
Sa
intero na magurang ini an mensahe ko sa iyo
Kon
gusto na an bata na lalake dumako na macho
Bata
pa irayo sa mga kulibangbang nan mga bisyo
Basi
diri magkunday o maging adik an iyo soltero
Vol. XV No.9 (September - October 2003)
Copyright © 2003 Damayan-Buluseño Gazette Online Edition | All Rights Reserved